أصله مصري

10387317_343333565872585_2502088596109486613_n

المكان : الحسين.

التوقيت : كانت تقريبا الساعة 10 الصبح من حوالي سنة ونص.

الإتنين اللي قاعدين ع الشمال دول، واحد منهم عامل ستاند بيبيع فيه أكسسوار حريمي، ستاند صغير قوي (فرشة يعني).

كان أول مرة أنزل مصر بعد غياب 5 سنين وكانت أول مرة مراتي تنزل مصر أصلا.

وإحنا معديين من جنبه عجبها حاجات من اللي هو عارضها، المهم نقينا وأنا فاصلت معاه لغاية ما جيبت أخره 😀 (عايز آوريها إني ناصح وكده)، جه وقت الدفع وعلشان كانت إصطباحة ووقت إستفتاح مكانش معاه فكة خالص ولا اي حد من اللي حواليه حتى المحل اللي بيبيع شيشة قدامه مفيش خالص.

قولتله وبعدين طيب !!! خد الفلوس دي وشوية وهعدي عليك آخد الباقي، راح قايلي : عيب عليك ياعم والله أبدا إنت لف لفتك ووقت ما تبقى قريب عدي عليا إديني الفلوس.

– أنا : ياجدع إنت ما ينفعش!! ده إستفتاح.

– هو عادي والله … صباح الفل.

– أنا : ياعم يمكن أنسى ولا أطمع في الحاجة 😀

– هو : هدية مني ليك ومسامح والله 🙂

– أنا : O.o إنت مين يا عم إنت ؟!! 😀

– قالي إنت هترجع أنا عارف، صباح الفل .. خد لفتك وأنا قاعد ولو ملقتنيش إديهم للمحل اللي قدامي.

مشيت وطبعا مراتي اللي أول مرة تروح مصر وتشوفها كانت مستغربة جدا من إن واحد بضاعته كلها متكملش 1000 جنيه سايب تقريبا ربعهم مع واحد ميعرفوش

لما رجعت إديته تمن الحاجة قبل ما أفاصل معاه ومكانش عايز ياخدها … ويوقولي لا إحنا إتفقن

  والله ياعم فيها حاجة حلوة.. مش قوي بس موجودة

يومكوا جميل

Walid Taha

Leave a Reply

This site uses Akismet to reduce spam. Learn how your comment data is processed.