القواعد الـ٢٠ لأي حاجة‼️

انا مبحبش أدي نصايح.. بس بحكي تجارب، ولما حاجة بتحصل في يوم زي النهاردة كده، بتشجعني اكتب وأحكي، فوسع صدرك واقرا الكلمتين دول.

مفيش حاجة اسمها كل المصريين في الغربة وحشين وما يتعاملوش، ايوه فيه وحشين قوي، بس ما تعممش، فيه ناس انا قابلتهم هنا اكتر من الأخوات، متخليش مواقف صغيرة تخليك تحكم ع الكل.. كبر دماغك واكبر.

علشان كلنا مغتربين للأسف مسيطر علينا فكر “المصلحة أولا” فمتترميش على حد قوي، ولا تتعشم وتسند قوي، خليك معتدل في كل حاجة… العقل حلو.

متقيدش نفسك في روتين، ومتقفلش على نفسك وفجأة تتحول لمربوط في ساقية وعينك متغمية وانت مش حاسس Have Fun as much as you can.

كافيء نفسك من وقت للتاني من غير مناسبة، اي حد بيحب الهدايا اللي من غير مناسبة، عامل نفسك كده.

متصاحبش متطرف في اي حاجة، ولا في حبه او كرهه لحد ولا في حبه او كرهه لحاجة. وإبعد عن العصبيين والشتامين، والمتعاليين .. قرب من الطيبين، هتعرفهم بما تقابلهم.

ماتقفلش علاقة “اي علاقة” بشكل وحش، متخليش حد يفتكرك ويقلب وشه.. خليه يفتكرك ويبتسم حتى لو علاقتك بيه انتهت.

بطل شكوى للشكوى.. محدش بيحب يقعد مع حد بيسودله الدنيا، الوايني بيتشز والاتنشن هورز مكروهين.

زمايلك في الشغل كنز، أه والله.. ايوه هيبقى فيه منهم وحشين او مش راكبين على دماغك.. ابعد عن الوحشين وخلي كلامك على قد شغلك معاهم، وقرب من الكويسين.

اتعلَّم لغة جديدة ولو حتى أساسيتها، هتغير فكرك ونظرتك للأمور صدقني، وهتخليك تقرا كلام مفيد وتفتح عينيك.

ابعد عن السوداويين وقرب من اللي بيضحكوا وبيضحكوك… العمر قصير.

السوداويين دول مش اللي جاي يشتكيلك ويحكيلك مشكلته، السوداوي اللي على طول شايفها سودة، حياته وحياة غيره.

اعمل حاجة بتحبها كل يَوم ولو لساعة واحدة ولو كانت حتى آيبود وتتمشى.

والله لو لبسك نضيف وريحتك حلوة كفاية قوي، مش لازم تقف ساعتين تختار وتسرح شعرك، فضي دماغك من الاختيارات الصغيرة دي.

ساعد الناس وتطوع كتير، طبعا مش على حساب صحتك وشغلك، بس والله احساس حلو قوي انك تعلم حد حاجة، او تساعد محتاج.

متخليش حد يختارلك اي حاجة، انت لا ناقص رجل ولا أيد ولا عقل، كل اللي بتحبه والبس اللي بتحبه وارتبط باللي انت عايزه، محدش ليه عندك حاجة، لو مجبتش بوفتيك محدش هيقول حاجة 😀

وعلشان محدش ليه عندك حاجة، انت كمان مالكش عند حد حاجة، لا تحكم ولا تتكلم وتنتقد الناس، اصلح نفسك الاول.

متتحجش بالوقت والعيال والسن، اللي عايز يبدأ ويعمل هيعمل.

مش لازم تتجوز/ي من جنسيتك.. هو مش واجب وطني، محدش هيتقفل عليه الباب غيرك.

إوعي تبطل تحاول.. بالذات وانت متاكد انك صح.

Leave a Reply

This site uses Akismet to reduce spam. Learn how your comment data is processed.