متستغربوش م الـ “ز” العظيمة

من الواضح إن الراجل واخد موقف من الحرفين “ز” و “ذ” .. ومُصر يشحططهم وراه.

ومتأكد إنه نِفسه يعمل Deactivate بس إبنه اللي عامله البروفايل ومستنيه يرجع م الساحل.

زي ما انا متأكد إنه عامل Follow للأخت الـ “محلله سساسيه وباحثه فى مجال حروب الجيل الرابع والخامس”. (السين مكتوبة كده في خانة الوظيفة)

ومن غير ما ادخل بروفايله فهو أكيد عمل شير لحاجة عن “هارب” وحذر الناس من خطط الماسون، ومن ‫#‏المجلس_الاعلى_للعالم‬.

ومتأكد كمان إنه عمل Follow لأبو عرايص … وممكن يكون بعتله Add وعرايص نفضله، وهو بعتله .. والراسالة راحت الـ Others.

الراجل ده ميفرقش حاجة عن مدرسين الإنجليزي بتوع “زا فيش إن زا سي”، اللي كانوا بيخلوك تكتب الكلمة 560 مرة علشان تحفظها.

ولا يفرق حاجة عن مدرس العربي اللي كان بيحفظك شِعر وهو أصلا مش حافظ بيتين على بعض.

وهو نفس مدرس التاريخ اللي كل التاريخ اللي يعرفه في حياته هو الكتاب المدرسي.

وهو مدرس الألعاب اللي كان بيخليك تلم زبالة.

وهو مدرس الدين اللي ميعرفش حاجة غير حديث أركان الإسلام، وحافظ قصار الصور بالعافية.

وهو مدرس الرسم اللي مبيعرفش يرسم.

هو كل دول فمتستغربوش .. هو طول عمره موجود.
‫#‏طويط_كأنك_وذير‬

Follow on Facebook

Leave a Reply

This site uses Akismet to reduce spam. Learn how your comment data is processed.