مش بالكلام!!

طول ما انت ما نفذتش وبتقول حاجات زي “نفسي”، فالمحصلة “صفر”، التسويف ونفسي مش خطوات ومش تخطيط. وكل يوم بتضيعه بيأخرك ١٠لأن الدنيا كبيرة قوي والفكرة اللي عندك موجودة عند كتير والحاجة اللي تعرفها فيه ملايين غيرك عارفينها.

الشغف مش حاجة بتنزل من السما فبتصحى م النوم عندك شغف ولا بتروح تجيبه في كيس، ده تدريب لنفسك على الالتزام ناحية الحاجة اللي عايز تعملها والاستمرارية.

مفيش حد بيحب يصحى بدري وينام متأخر عشان شغال على حاجة حتى لو عايزها وبيحبها، بس بيدوس على نفسه في الاول ويضغط لغاية ما يتعود ويبقى الموضوع ده جزء من يومه وحياته وهو ده الشغف.. مش شغف التنمية البشرية.

مفيش رياضي بيحب التمرين زي ما انتوا متخيلين، بس دي بقت حياته، بعد ما درب نفسه مع جسمه.

فطول ما حضرتك مستني الشغف مش هييجي، انت اللي بتروح تجيبه، لان شكواك من قلة الطاقة “شماعة” معلق عليها كسلك.

دايما في أفلام الخيال العلمي بتتكلم عن ان اي تغيير صغير في الماضي بيعمل تغيير كبير في المستقبل، كسلك دلوقتي هيغير المستقبل، وشغلك على نفسك برضه هيغير. والاختيار ليك.

Leave a Reply

This site uses Akismet to reduce spam. Learn how your comment data is processed.