٢٠ حاجة.. خليهم من عاداتكوا

الحاجات دي هتفرق معاكوا كتير:

١- ماتطولش التفكير قوي لدرجة انك تبقى بارانويد، انت عارف قرارك وعارف عايز ايه وعارف هتنفذ ازاي.. متنيل واقف بتعمل ايه؟!

٢- اللي فوق ده مش معناه “التسرع” خالص، بالعكس لازم دايما تبقى جاهز بخطط بديلة عشان برضه متضيعش وقت في الدراما والتخطيط من جديد. خليك yin-yang في نفسك.

٣- دور على Motivation، فلوس.. شكل اجتماعي.. ترقية، المهم خلي دايما قدامك حاجة محفزاك. أحسنهم الفلوس الحقيقة 😁

٤- إوعى ترضى أو تقنع أو تشبع، تبقى حمار وهتقف عند نفس النقطة وهترجع ورا كمان. استمر ودايما أسعى للأحسن.

٥- متعتمدش على حد، ومتستناش حد، لو حد جالك يساعدك فل، مجاش خليك Strong & Independent فعلا، وفي نفس الوقت إنفع غيرك.

٦- التغيير مطلوب وحلو وواجب، بالذات لو في مكان/وضع مش عاجبك/مش بتاعك. لكن التغيير ده لو من غير تخطيط واستعداد كويسين هيبقى كابوس. استعد كويس.

٧- في فيلم G.I. Jane كان فيه مشهد أول ما المتدربين دخلوا الفرقة:

‏Master Chief John Urgayle: Pain is your friend, your ally, it will tell you when you are seriously injured, it will keep you awake and angry, and remind you to finish the job and get the hell home. But you know the best thing about pain?

‏Lt. Jordan O’Neil: Don’t know!

‏Master Chief John Urgayle: It lets you know you’re not dead yet!

ده هو الضغط في حياتنا العادية، عشان اول ما تحس ان الموضوع بقى سهل يبقى انت محتاج challenge اكبر يحطك تحت ضغط يعلمك ويحفزك.

وزي ما روبوت هوري قال “Pressure can bust pipes, but it also can make diamonds.”

٨- الفشل سيّء جدا، احساسه والفترة اللي بعده بتبقى وحشة فوي والواحد بيكون تايه.

مع اننا ممكن نستخدمه في تطوير نفسنا والتخطيط بشكل احسن للمرحلة او التجربة الجديدة، بس فيه كتير بيختاروا الاحباط.. متبقاش منهم!

٩- بطبيعتنا بنحب المنافسة، بس متشغلش نفسك بيها، ولا هتنافس مين، خليهم هما اللي يبقوا عايزين ينافسوك، انشغالك بنفسك وتطويرها احسن ١٠٠ مرة من تضييع الوقت في انك تثبت اي حاجة لأي حد!

١٠- اتعلم.. اتعلم.. اتعلم واتعلم وكمان اتعلم، متضيعش يوم من غير ما تتعلم حاجة جديدة، حياتك قايمة ع التعليم والمعرفة.

١١- في كتاب اسمه deep work الكاتب صنف الشغل لمستويين:

– عميق

– سطحي

العميق: النادر واللي جودته عالية ومحدش تاني يعرف يعمله زيك!

السطحي: العادي المكرر واللي جودته قليلة واي حد يقدر يعمله.

طبعا انت عارف انا عايزك تبقى فين!

١٢- الثقة حلوة وهي اللي هتخليك تعمل حاجات انت نفسك مش مصدق انك تعملها، بس متخليهاش تشدك ناحية الغرور وتشغلك.

١٣- متحرقوش جاز كتير في الدفاع/تبرير نفسكوا، اللي يصدقك يصدقك واللي عايزك كده يعوزك واللي مش عايزك الباب يفوت ديناصور.. اعملوا اللي يريحكوا.. الحياة قصيرة

١٤- احنا نتيجة الماضي ما قولناش حاجة، بس مش معنى كده نفضل عايشين فيه، محتاجين نفكر في يومنا وبكرة، عشان كده خليكوا مع ناس بيفكروكوا ببكرة، مش كل شوية يقول “ما انت/ـي كنت/ـي بتعمل/ـي) .

١٥- فيه مثل مشهور بيقول “work smarter, not harder” وده حقيقي جدا، اصلا معنى انك تلاقي طريقة سهلة، يعني انت وصلت لدرجة إجادة عالية، والتبسيط “تمكن”.

‏“If you can’t explain it simply, you don’t understand it well enough.” — Albert Einstein

١٦- متشغلش نفسك بالغيرة والحقد ومراقبة غيرك، اشغل نفسك بـ… إرجع لرقم ٩.

١٧- خلي دايما هدفك اعلى شوية من امكانياتك الحالية، بس مش اعلى كتير خليك واقعي، الهدف انك تطور نفسك فتوصل للمحطة التانية، مش عشان تتكسح.

١٨- استريح.. لازم تاخد وقت off، اعمل فيه اي حاجة ولو هتقف تعمل القهوة عريان زي محمود عبد العزيز. المهم فكوا دماغكوا من فترة للتانية.

١٩- اتعلم تتواصل مع الناس اللي حواليك بالذات في الشغل، وتفهم متطلباتهم كويس بالذات لو شغلهم قريب منك أو بيعتمد عليك او شغلك بيعتمد عليهم.

٢٠- وأخيراً… الـ Multitasking أسطورة، مالهاش اي تلاتين لزمة، ولازم هتنسى حاجة او حاجة جودتها مش هتطلع مظبوطة، اشتغل في حاجة واحدة وخلصها بتركيز وادخل ع اللي بعدها.

وده مش كلامي، ده “العلم” اللي بيقول:

‏”People can’t multitask very well, and when people say they can, they’re deluding themselves,” said neuroscientist Earl Miller. “The brain is very good at deluding itself.”

Leave a Reply

This site uses Akismet to reduce spam. Learn how your comment data is processed.