مشوار المليار بيبدأ بـ٥١٢٧ نموذج فاشل!

معرفش لو فيه حد فيكوا يعرف نوع مكنسة إسمه Dyson ولا لأ.. بس دي المفروض من أحسن وأقوى وأغلى أنواع المكانس الموجودة في السوق وده لإن الباور بتاعها عالي قوي، وما بيضعفش مع الوقت.. فقوة الشفط بتفضل زي ما هي مهما مر عليها وقت.. بالإضافة إلى إنها مفيهاش كيس بيتغير كل شوية

المهم هنا مش المكنسة… المهم إن اللي إبتكرها “فشل” في تطبيق الموضوع ده 5127 مرة… أيوة زي ما قريت كده عمل 5127 نموذج عشان يطلع بأول موديل DC01!

النهاردة James Dyson ملياردير وتقريبا ثروته عدت الـ5 مليار دولار..

حاول لمدة 15 سنة، ومراته هي اللي كانت واقفة جنبه طول الوقت ده، لإن أفكاره كانت بتترفض، لغاية ما اليابانيين أنقذوه وأخدوا منه موديل إتباع في اليابان بس، واتباع منه كتير لدرجة إنه فتح مركز أبحاث صغير ومصنع في Malmesbury في إنجلترا سنة 1993.

لغاية النهاردة وهو داخل ع الـ70 .. وملياردير.. جيمس ما زال بيبتكر ،شغال عادي، ولا سنه ولا غِناه خلاه يبطل شغل، زي ما فشله وفقره ما خلهوش يبطل محاولة.

هو اللي ابتكر المروحة اللي من غير ريش داخلية، وفيه منها نفس التصميم بس دفاية ومنقي للهواء… إبتكر برضه مجفف للإيد زي الموجود في الأوتيلات والجمامات العامة إسمه Airblade بينشف أسرع بكتير من اللي كان موجود قبل كده.. وغيرها ابتكارات نجحت وسمعت وبنستعملها.

إشترى بيت أو قصر أو سميه اللي إنت عايزه .. مساحة الأرض اللي عليه 1.2كم مربع بـ 15 مليون جنيه استرليني، سنة 2003 البيت أصلا حاجة تاريخية وإسمه Dodington Park

مش عارف بقى اللي فشل مرتين تلاتة وبعدها قعد وقالك مش نافع وخلاص زهقت.. هيحس بإيه بعد ما يقرا الكلام ده.

الفشل موجود عشان نتعلم منه مش عشان يحبطنا. والخوف موجود عشان نخطط كويس مش عشان نفضل مكاننا!

جربوا تتفرجوا على الفيديو ده

الشغف والنجاح والموهبة.. والولا حاجة !

https://youtu.be/-4v1QaF8bKU

والفيديو ده

الموهبة مش كل حاجة.. المهم تبدأ!

https://youtu.be/MyxcRAYJDNI

المحاولة .. المحاولة.. المحاولة

Leave a Reply

This site uses Akismet to reduce spam. Learn how your comment data is processed.