أنا مش موهوب …

صباح الخير ..
أنا مش موهوب في أي حاجة خالص، حتى وأنا صغير كنت اتفرج ع الناس اللي بيعرفوا يرسموا او يكتبوا او يغنوا او حتى رياضيين بنظرة “نفسي أكون بعرف اعمل اللي بتعمله”.

وصلت إني كنت لما اتفرج على برنامج للمواهب وفيه تكريم لحد، كنت أتنكد أفضل أقول لنفسي “انت لزمتك ايه في الدنيا؟! ليه معندكش أي حاجة من اللي عند الناس دول؟! طيب جاي تعمل ايه يعني في الدنيا؟! ايه مشاركتك؟!”

وكنت في الوقت ده زي معظم اللي في سِني، شغل خروج وسهر وحركات.

شغل مش عايزه ومبحبوش وبروحه زي الزومبي عشان أضيع تقريبا ١٢ ساعة فيه واخد فلوس اصرفها وشكرا، من غير اي حاجة زيادة بتحصلي، وبرضه كنت اتفرج وأقول “انا لزمتي ايه في الدنيا؟!”.

لغاية ما جه وقت قعدت وفكرت وقررت اتعلَّم الحاجة اللي بحبها بس مش موهوب فيها.

من غير حكاوي ناس كتير هنا عارفينا، علمت نفسي بنفسي كل حاجة اعرفها دلوقتي واشتغلت عليها كل يوم وكل ساعة وفِي كل فرصة من غير ملل، بشغف عالي جدا مكانش موجود بس انا أجبرته انه يخرج بإصراري وقتها، واللي امتد لغاية النهاردة وانا داخل على 40 سنة.

جرافيك، تصوير، Music Programming ، وحاجات تانية كتير بتعلمها كل يوم لغاية النهاردة، واشتغلت بيها ونجحت.

اخيراً…
إخلق موهبتك وكبرها واهتم بيها.. الموهبة مش كفاية لأي حاجة، لو مشتغلتش عليها، وفيه كتير اتخلقوا موهوبين وموهبتهم ماتت عشان ما عملوش حاجة بيها.

لو بتسأل نفسك نفس الأسئلة اللي كنت بسألها لنفسي زمان، اقعد وفكر واسأل نفسك تاني “أنا بحب إيه؟” واتعلمه واشتغل عليه، هتبقى أحسن من موهوبين كتير.

سنك، وقتك، مسؤولياتك، ظروفك، قلة معرفتك .. مش أسباب تخليك تندب حظك من غير “فعل”، إبدأ من دلوقتي .. هتفرق كتير بعدين.

ليس من النبل في شيء أن تكون أعلى منزلة من غيرك، إنما النبل الحقيقي أن تكون أعلى منزلة مما كنت عليه من قبل.
إرنست هيمنغواي

2 comments

  1. انا حاليا في الفترة دي من حياتي كده، حاسه ان كل اللي بعمله ولا ليه قيمة، واني مليش اي لازمه، ولا عندي أي مواهب، جايز موهوبة في حجات لكن بضيعها مني !!

  2. تدوينة ملهمه ! فعلا انا من زمان كان عندي نفس الشعور *ايش لزمتي بالحياه* ، ،شكرا لك بحجم السماء 🙏🏾

Leave a Reply

This site uses Akismet to reduce spam. Learn how your comment data is processed.