عن الجزء الجديد من فيلم Shaft!

فيه ممثلين/فنانين عندهم حاجة غريبة في شخصيتهم وطريقة تمثيلهم ووجودهم أصلا على الشاشة، وهي إنك لو شوفت اسمهم في أي فيلم/مسلسل/برنامج/فيديو/تويت/بوست، هتبقى مهتم تتفرج او تقرا. بغض النظر عن قيمة أو حرفية أو جدية المحتوى.

ومن الناس دول، بالنسبة لي، صامويل جاكسون، أي حاجة الجدع ده فيها بتفرج عليها من غير تردد، وزي ما قولت بغض النظر عن بيقدم إيه في المحتوى ده.

يعني امبارح مثلا اتفرجت على الجزء الجديد من فيلم “شافت” من انتاج نيتفليكس، وطول الفيلم بضحك، وعاجبني الفيلم، مع إن الفيلم “كوميكي” جداً وقالب اتهرس واتعمل كتير، بس المرة دي جاكسون هو اللي اللي بيمثل، ده غير إن الفيلم حقق النقطة المهم قوي في إي محتوى، وخصوصا دلوقتي، إنه Entertaining.

وده لان أوقات كتير بيبقى فيه أعمال قوية جدا وليها قيمة كبيرة ومتكلفة جدا، بس فقدت او الـEntertainment فيها قليلة، فبتزهق، وممكن متكملش ولو كملت، مش هتبقى عايز تتفرج على العمل تاني.لكن لو أخدنا فيلم زي ماتريكس كمثال، انا بتفرج على الجزء الاول تقريبا مرة في الشهر، لكن الأجزاء التاني والتالت، اتفرجت عليهم مرتين تلاتة مثلا!

أو أفلام مارفل Marvel اللي بشوف افلامها اكتر كن مرة، لكن أفلام دي سي DC مبعرفش اتفرج اكتر من مرتين على أي فيلم.

المهم نرجع لجاكسون، الراجل فعليا قادر يقدم صورة كلاسيكية جدا عن شخصية البطل الخيالي اللي مش فارقة معاه وقادر يعمل كل وأي حاجة بأسلوب ساخر، حاجة زي The Expendables كده، اللي هو احنا بنقتل أه بس برضه Having Fun.

طبعا مش صامويل جاكسون بس اللي كده، فيه دينزل واشنطن وفيه كيانو ريفز وفيه جوني ديب وفيه كتير زيه كده، طالما اسمهم موجود يبقى أنا شاري.

اتفرجوا عليه وقولولي رأيكوا في التعليقات.

Leave a Reply

This site uses Akismet to reduce spam. Learn how your comment data is processed.