ليه لازم تعرف أكتر عن الـ”داتا ساينس”

الناس اللي بيتابعوني على يوتيوب أو فيسبوك عارفين إن بقالي اكتر من سنة دلوقتي، معظم اللي بقوله في البوستات أو الفيديوهات لازم تيجي فيه مصطلحات زي Data وBig Data وData Science وArtificial Intelligence وDeep Learning وIoT وBlockchain وCloud وPython.

وده مش ترويش مني ولا حاجة، بس عشان المجالات دي، بغض النظر عن ارتباطها ببعض، بتمثل جزء كبير من الثورة الصناعية الرابعة، واللي بسببها بيحصل التحول الرقمي اللي احنا شايفينه بيحصل حوالينا كل يوم.

شركة Seagate عملت دراسة في ٢٠١٨ اسمها Data Age 2025، الدراسة لقت إن حجم البيانات اللي هتنتجها البشرية هيوصل لـ175 Zettabytes سنويا، مع حلول سنة 2025!

هتقولي وماله؟ يعني هي إيه الزيتابايت دي؟

الزيتابايت دي لو مش عارف، فهي بتساوي ألف إكسابايت، موصلتش لسه؟ طيب:

الإكسابايت = ألف بيتابايت

البيتابايت = ألف تيرابايت (عارفها دي طبعا).

التيرابايت = ألف جيجابايت

حول الكلام اللي فوق ده وبعد ما تخلص اضربه في ١٧٥ ولما تفوق م الصدمة تعالى كمل قراية، عشان اقولك تاني ان ده حجم البيانات اللي هينتجه البشر سنويا قريب قوي، بعد اقل من ٦ سنين بس!

حجم البيانات الضخم ده هيكون نتيجة التحول الرقمي والأجهزة الذكية “IoT Devices” في حياتنا، واللي هتعتمد على تعلم الآلة وأشكال تانية من الذكاء الاصطناعي، مش بس في التعامل معانا ولكن كمان في تحليل البيانات اللي هتنتجها الأجهزة دي أثناء تعاملنا معاها، بداية من الساعة لغاية السيارات ذاتية القيادة، مرورا بالمستشعرات اللي هتبقى موجودة في كل حاجة حوالينا تقريبا. ده غير محتوى الفيديوهات الـ360 بجودة HD والواقع المعزز وتكنولوجيا 5G.

كل الكلام ده معناه إيه؟

معناه إنك لو مهتم بأي من التخصصات اللي قولتها في أول كلامي، فلازم تتعلمها. ولو مش مهتم فلازم تعرف أساسياتها وتستعد للمرحلة الجاية، وإنك تعمل ده مع ولادك وتشجعهم يتعلموا المجالات دي، عشان معظم ولو مكانش كل المجالات في المستقبل هيبقى فيها جزء رقمي أو ذكي.

Leave a Reply

This site uses Akismet to reduce spam. Learn how your comment data is processed.